Tot au long de la baranda deu Baloard deus Pirenèus, dens la partida compresa enter la plaça Reiau e lo Parc Beaumont, que son installadas 52 placas de metau qui servishen de marca de cap a sites de montanhas.

 

Lo paratron apitat sus la cheminèia de l'Usina deus Trams, lòc qui auberga au dia de uèi las archius comunautàrias e lo servici patrimòni de la Mediatèca André Labarrère, que servish de punt d'amira despuish totas las placas.

Tà localizar un som dab precision, cada placa qu'ei passada per un pic talhat directament sus la man tenguedera de la baranda.
Lo numèro deu panèu, lo nom deu site amirat, l'altitud deu som o deu villatge  e la distància en quilomètres qui dessepara lo lòc de Pau que son gravats sus caduas de las placas.

Instaladas en 1900, un mes arron l'inauguracion de l'Usina deus Trams, que devem aqueste ingeniós sistèma d'orientacion aus arquitèctes Rolland Meunier e Maussier.
A l'origina deu projècte 61 placas qu'èran previstas, atau com tres panèus de tòla fixats suus colomnas en fonta, ensenhant lo numèro d'ordi, la designacion e l'altitud de cada pena.
Uèi, que denombram 56 punts d'amira mes solament 52 placas, los numèros 2, 3, 29 e 34 estant desapareishudas atau com cinc placas mei importantas sus las quaus que podem léger :

Entà reconeisher un som,
Visar lo paratron
de l'Usina deus Trams
e leger lo son nom sus la placa.

Las placas 15 e 38 que son dobladas (15 bis e 38 bis). Los numèros 19 e 20 que son inversats e bahida la loa legenda.

Lo budget deu dispositiu d'orientacion qu'era estat estimat dens la deliberacion 1D1/38 f°409 deu 1er de mai de 1900

a 3 francs per placa
70 francs per panèu indicator
sia 183 francs tà l'ensemble de las placas, 210 francs taus tres tablèus indicator e 27 francs taus imprevists, tà un totau de 420 francs.

 

Lista complèta deus senhaus suu Baload deus Pirenèus
Rapòrt de l'ingenhaire Voyer
Deliberacion deu Conselh Municipau deu 1er mai 1900