Col d'Aspin

Còth d'Aspin

« A quate òras, qu'èm au pè deu Còth d'Aspin e que s'aprestam a arpentar los longs cutorns qui amian au som. Darrèr nosautes, la vath que s'ésten pendent que garrapam ; navèras brecas e honsadas qu'apareishen, e horquejan a dreta e a gaucha de cada costat.
Après mieja òra, los pics que començan a puntejar per dessus los costalats darrèr nosautes ; que's desvelan l'un après l'aute, cadun mèi blanc e mèi puntagut que l'aute ; dincas que la linha de la crèsta sud aparesca com las dents d'ua sèga ; qu'eslissan au dessús deus costalats vesins. Lo panorama prometut que comença a préner fòrma. Que s'aprocham de la crèsta deu còth.
Lo Pic deu Mieidia de Bigòrra que's dessina enlà de las nublas uei, que'ns disen los pistaires, e qu'ensajam de veder enfin lo pic mitic qu'avèm contornejat devath las nublas, de Barrègas dinc a Bigòrra e que n'avèvam tostemps pas briga vist.
Qu'èm sonque drin enlà deu som deu còth ; un vintenat de pès de mèi e los atelatges que's trobaran au som quan d'un sol còp, un gigant dòma arredonit que's quilha enlà deu bòrd, e que's suslhèva entà apareisher hens la soa plea mesura de Pic tan longtemps cercat, dètz miles mèi a l'oest, hèra distinctament, medish si èi de l'aute costat de la vath. Que's quilha sol contra lo pè deu cèu ; nat som pòt rivalisar ; los sons contorns que son negres, arrabents e quasi shens nèu ; lo som èi com apitat au dessús de Gavarnia – au dessús de Pau – au dessús de la grana marcha de las planas de Francia, com au dessús de nosautes suu Còth d'Aspin, que'ns espia de haut de la soa mirada rocalhosa pirenenca. »

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.


Escotar la version originau

Extrèit deu libe inglés : Dix, Edwin Asa (1860-1911). - A midsummer drive through the Pyrenees / by Edwin Asa Dix,... Illustrated. -  G. P. Putnam (New York), 1890.Mediatèca André Labarrère – fons ancians – Usina deus Trams (Usine des Tramways) - 99096R.
En linha sus Gallica

Galeria Còth d'Aspin [span class=

  • Français
  • Anglais
  • Espagnol
  • Allemand
  • Occitan

Despuish lo baloard ...

Horizons qu'estó realizada merces au concors de la Fabrica de la Banca Numerica deus Sabers en Aquitania.

Lo projecte qu'èi portat per la Communautat d'agglo Pau-Pireneus.